Sí brellbita úr nýggja filminum hjá Sakarisi Stórá

Tað er í løtuni rættiliga langt millum føroysku spælifilmarnar.

Tað er nærmast sum lundi á jólanátt, at ein nýggjur føroyskur filmur er at síggja í biografunum. 

Men 10. apríl byrjar nýggi filmurin hjá føroyska filmsleikastjóranum Sakarisi Stórá, "Síðsta paradís á jørð", at ganga í Havnar Bio. 

Og í dag ber til at síggja fyrsta brellbitan frá filminum. 

Tað eru Adomeit Film, Kykmyndir og Øst for Paradis Filmimport sum hava latið "Síðsta paradís á jørð" framleiða. 

Ein søga um samleika, sakn og longsul

Í stuttum snýr "Síðsta paradís á jørð" seg um hin unga Kára, sum livir eina friðarliga tilveru í einari lítlari føroyskari bygd.

Kári fær tó nakrar avbjóðingar, tá vinir flyta, arbeiðspláss hvørva, og hann noyðist at finna sín egna samleika í einum samfelagi í broyting. 

Kára dámar væl einfalda lívið í lítlu føroysku bygdini, men saman við systrini, Silju, so syrgir Kári í øllum stillum deyða mammunar.

Kári leitar sær troyst í arbeiðinum á flakavirkinum í bygdini, Silja hevur trupult við at gera skúlan lidnan, og pápi teirra stingur av til sjós. 

"Síðsta paradís á jørð" er ein søga um samleika, sakn og longslu. Ein søga um lívið, ið er, og vónina um ein betri morgindag, stendur í tíðindaskrivi frá Kykmyndum.  

Spennandi høvuðsleikarar

Í høvuðsleiklutunum eru Sámal H. Hansen sum Kári og Bjørg Brynhildardóttir Egholm, sum roynir seg fyri fyrst ferð á filmi, ið spælir leiklutin sum lítlasysturin Silja.

Síðsta paradís á jørð, Sakaris Stórá, Last Paradise On Earth, Bjørg Brynhildardóttir Egholm

Bjørg Brynhildardóttir Egholm roynir seg fyri fyrstu ferð í einum filmsleiklut, tá hon spælir Silja í "Síðsta paradís á jørð"

Annars er bæði kendir og ókendir sjónleikarar við í filminum, eitt nú Hans Tórgarð og Annika Johannessen. 

Sakaris Stórá, ið hevur leikstjórnað, fekk sína filmsdebut í 2017 við "Dreymar við havið".

Sakaris Stórá hevur skrivað handritið saman við Tommy Oksen og Mads Stegger, og hin virðislønta Virginie Surdej hevur filmað. 

Jón Hammer frá Kykmyndum hevur framleitt. 

Síðsta paradís á jørð, Sakaris Stórá, Last Paradise On Earth