Fyrrverandi bygdarráðslimur: Byggisamtyktin loyvir bygging á økinum

Meðan núverandi bygdarráð í Eiðis kommunu heldur, at tað er ímóti byggisamtyktini fyri kommununa, at byggja húsið millum Vatna, so heldur undanfarna bygdarráð, at løgfrøðin er í lagi.

Tað sigur Tummas Súni Joensen, limur í undanfarna bygdarráð í Eiðis kommunu.

Undanfarna bygdarráð í Eiðis kommunu undirskrivaði tann 31. desember í fjør sáttmála við Sp/f Búð um bygging av húsinum millum Vatna, sum millum annað skuldi hýsa eldrafelagið í bygdini, umframt frítíðarskúla og ungdómshús, men tað fyrsta, ið núverandi bygdarráð gjørdi, var at strika sáttmálan við byggifyritøkuna, tí tað er ikki í tráð við byggisamtyktina fyri økið - øki F.

Men hetta vil Tummas Súni Joensen, bygdarráðslimur í undanfarna bygdarráð á Eiði, ikki hava sitandi á sær.

Tummas Súni Joensen sigur, at undanfarna bygdarráð hevði løgfrøðina í lagi, tá sáttmáli varð skrivaður við byggifyritøku tann 31. desember í fjør, um at byggja húsið millum Vatna.

Harvið tykist tað at vera ein tulkingarspurningur millum núverandi bygdarráð og undanfarna bygdarráð um heimildina at byggja á øki F.

Tí meðan Jógvan í Skorini sigur, at byggingin er ólóglig, so sigur Tummas Súni Joensen, at byggingin er lóglig, og tí er sakførarin hjá kommununi, Djóni Thomassen, blivin skeivt endurgivin.

Tummas Súni Joensen heldur, at borgarstjórin við vilja roynir at steðga verkætlanini, tí øll loyvini vóru upp á pláss.

Hoyr innslag í útvarpstíðundunum:

Les eisini:

https://kvf.fo/greinar/2025/01/16/strid-um-husid-millum-vatna-eidi