Kringvarpið vísir dystin millum Víking og Gent

Klokkan 19 í kvøld fara Víkingur og belgiska liðið Gent á vøllin við Djúpumýru í Klaksvík at dystast um at koma víðari í UEFA Conference League-kappingini. 

Jørgin Nielsen tók alt og øll á bóli við at leggja Víking á odda 1-0 í fyrra dystinum í Belgia. 

Víkingur, Gent, fjepparar

Mynd: Eysturportalurin

Ta løtuna var rómur á Víkinga-fjepparunum, ið sóu út til at trúgva upp á, at liðið kundi skapa sensatiónina. 

Men sterka belgiska liðið risti skjótt skelkin av sær og setti seg tungt á dystin, sum Gent at enda vann 4-1.

Sigurin gjørdist óneyðuga stórur, tí onkur av málunum vóru persónlig mistøk í verjuni hjá Víkingi. 

Sama útgangsstøði sum KÍ

Harvið hevur Víkingur í grundini sama útgangsstøði, sum KÍ hevði til heimadystin móti Malmö FF.

Víkingur, Gent

Mynd: Eysturportalurin

Hóast KÍ tapti samanlagt móti Malmö FF., so bleiv felagið ikki varpað úr evropiskum fótbólti, men flutti niður í næstbestu kappingina hjá UEFA, Europa League-kappingina, at royna eydnuna. Har skal KÍ í fyrstu atløgu møta Borac Banja Luka úr Bosnia-Hersegovina

Og um eisini tað kiksar, so sleppur KÍ eisini at royna seg í UEFA Conference League-kappingini. 

Víkingur er longu í Conference League-kappingini, so um liðið tapir í kvøld, so er evropiska ævintýrið av hjá Víkingi. 

Kringvarp Føroya vísir dystin millum Víking og Gent í sjónvarpinum og her á heimasíðuni, og sendingini byrjar klokkan 18.50. 

Víkingur, Gent

Mynd: Eysturportalurin

Hvat: Víkingur - Gent
Hvar: í sjónvarpinum og á KVF Sjón
Nær: í kvøld kl. 18.50