HB skal steðga heimsstjørnum á Tórsvølli

HB skal steðga heimsstjørnum á Tórsvølli
KVF sigur frá dystinum í úvarpinum, tá HB skal royna at basa Ivan Rakitić, Ivan Perišić og hinum kroatisku stjørnunum á Hajduk Split-liðnum á Tórsvølli í kvøld
Hajduk Split vann fyrra dystin móti HB 2-0
Mynd: Finnur Justinussen / leit.fo  
 
01.08.2024 - 16:12

HB skal, eins og Víkingur, royna at spæla seg víðari í UEFA Confrence League-kappingini á Tórsvøllin í kvøld klokkan 20. 

HB hevur í útgangsstøðinum betri møguleika at koma víðari á pappírinum, tí HB megnaði einans at tapa 0-2 í útidystinum móti kroatiska stórfelagnum. 

Tað eru heldur ikki hvørjir sum helst, ið eru við kroatiska liðnum í Føroyum. Hvørt mansbarn, ið hevur fylgt við fótbólti seinastu 15 árini, kennir nøvnini Ivan Rakitić og Ivan Perišić, ið hava umboðað so mæt feløg sum Barcelona og Inter Milan, og annars vunnið upp í leypar av steypum. 

Og venjari fyri kroatiska liðnum er eingin annar enn italska miðvallarlegendan Gennaro Gattuso, ið var beinbrótari á miðvøllinum hjá Milan í síni tíð. 

 

Hajduk Split hevur eldhugaðar fjepparar, og stívliga 300 av teimum eru komnir við felagnum til Føroya.

Nøkur teirra hava gjørt nógv um seg á skeinkistøðunum í Havn. Í gjárkvøldið og í nátt var politiið nakrar ferðir á skeinkistøðum fyri at sissa fólk.

Skeinkistøðini hava loyvi til at hava opið til klokkan tvey í staðin fyri midnátt, tá slíkir fótbóltsdystir eru.

Dysturin millum HB og Hajduk Split byrjar á Tórsvølli klokkan 20, og vit siga frá dystinum í útvarpinum 

 

Hvat: HB - Hajduk Split
Hvar: í útvarpinum og á KVF Ljóð
Nær: kl. 20

Er kopiera
Nýggjastu sendingar í ÚV
Sunnudag 6. apríl
Bolero - Amy Beach
190318
Sunnudag 6. apríl
Guðstænasta í Kvívíkar kirkju
190317
Sunnudag 6. apríl
Møti úr Betesda í Klaksvík.
190316
Nýggjastu sendingar í SV
Leygardag 5. apríl
Sement 2025
190308
Leygardag 5. apríl
Nations League 2025: Føroyar - Moldova 2-0
190286
Fríggjadag 4. apríl
Veðrið
190275
Fríggjadag 4. apríl
KAKUMiKS (2:7)
190170
Fríggjadag 4. apríl
Dagur og vika - teknmálstulkað
190243