Uppsøgnin av útbúgvingarstjóranum á Glasi er ógildað

Barna- og útbúgvingarmálaráðið hevur ógildað avgerðina hjá Unu Joensen, rektara á Glasi, at siga útbúgvingarstjóran, Elsu Maria Holm Olsen, úr starvi. 

Rektarin boðaði útbúgvingarstjóranum frá í januar 2023, at stjórastarvið á gymnasialum miðnámi varð niðurlagt í samband við bygnaðarbroytingar, og 28. februar fekk Elsa Maria Holm Olsen endaligu uppsøgnina. 

Men hesa avgerð hevur Barna- og útbúgvingarmálaráðið ógildað.

- Barna- og útbúgvingarmálaráðið metir, at grundgevingin fyri uppsøgnini av Elsu Maria ikki rímiliga kann grundast á bygnaðarbroytingar, tá ætlanin er at víðka um virksemi, samstundis sum mett var, at tørvur var á at siga Elsu Maria úr starvi. Bygnaðarbroytingarnar vóru ikki liðugt viðgjørdar sambært ætlanunum 28. februar 2023, og tí var ikki møguleiki fyri á uppsagnartíðspunktinum at meta um tørvin á starvsfólkum á Glasi. Grundgevingin fyri avgerðini um uppsøgn kann tí ikki rímiliga grundast á bygnaðarbroytingar, og hon er tí ósaklig, skrivar aðalráðið í niðurstøðuni.

Hoyr innslag í útvarpstíðindunum: