Liðug at kanna møguleikan fyri kommunusamanlegging

Arbeiðsbólkurin, sum seinasta árið hevur kannað vansar og fyrimunir við samanlegging av Fámjins, Tvøroyrar og Hvalbiar kommunum, er nú liðugur við sína frágreiðing.

Tað váttar Kristin Michelsen, borgarstjóri í Tvøroyrar kommunu.

Hann sigur, at kommunan hevur fingið boð frá arbeiðsbólkinum um, at frágreiðingin er liðug, men enn er hon ikki latin kommununum, og tískil hevur Kristin Michelsen ikki sæð ella lisið frágreiðingina enn.

Allar kommunur bodnar við

Tað stóð øllum sjey kommununum í Suðuroy í boði at gerast partur av arbeiðnum at kanna vansar og fyrimunir við kommunusamanlegging í oynni, men bert Fámjins kommuna, Tvøroyrar kommuna og Hvalbiar kommuna vóru áhugaðar í at gerast partur av arbeiðsbólkinum, sum bleiv mannaður við tveimum umboðum úr hvørjari av teimum trimum kommununum.

Kristin Michelsen sigur við Kringvarpið, at kommunan hevur fingið fráboðan frá arbeiðsbólkinum um, at bólkurin ætlar at leggja frágreiðingina fram fyri kommununum leygardagin 9. mars.

Tað hevur ikki eydnast at fáa viðmerking frá formanninum í arbeiðsbólkinum, sum er Róin Schrøter.