Russland og Hvítarussland vilja hava enn tættari samband

Forsetin í Russlandi og forsetin í Hvítarusslandi hittust á fundi í St. Pætursborg í gjár, har teir tosaðu um, hvussu samstarvið og samgongan kann mennast millum londini bæði.

Vladimir Putin, forseti, legði dent á, at grannalondini bæði hava ment eitt strategiskt samstarv sum part av 25 ára longu samveldisavtaluni. 

Hon fevnir ikki um samanlegging, men miðar eftir tøttum politiskum, búskaparligum og hernaðarligum sambandi. 

Tætta sambandið ger, at Russland longu hevur sett upp kjarnorkuvápn í Hvítarusslandi.

- Tað hevur týdning, at vit hava samstarv tætt við altjóða leikvøllin og vísa hvørjum øðrum ósvikaligan stuðul í eini tíð við trýsti uttanífrá á Russland og Hvítarussland, sum vit ongantíð hava sæð áður, segði Putin, tá ið hann tók ímóti Aleksandr Lukasjenko í St. Pætursborg í gjár.