Sunak tikið við sum forsætisráðharri

42 ára gamli Rishi Sunak er í dag tikin í eið sum forsætisráðharri í Bretlandi.

Hetta hendir bara 49 dagar eftir, at floksfelagi hansara, Liz Truss, var tikin í eið.

Tá var tað Elizabeth drotning, sum heitti á Truss um at skipa stjórn. Í dag var tað Charles kongur, sum heitti á Sunak um at skipa stjórn.

Í fyrstu røðu síni sum forsætisráðharri tosaði Sunak um stóru búskaparkreppuna, sum landið er í nú.

Charles kongur og Rishi Sunak

Rishi Sunak var fyrr í dag hjá Charles kongi, sum heitti á nýggja formannin í Konservativa flokkinum, Rishi Sunak, um at skipa stjórn.

Biður um álit

- Hetta merkir, at truplar avgerðir skulu takast, sigur Sunak, sum vísir til tíðina, tá ið hann var fíggjarmálaráðharri undir koronufarsóttini.

Hann biður bretar hava álit á, at hann er rætti maðurin til at leiða Bretland gjøgnum torføru tíðina, sum er fyri framman.

- Álit er nakað, sum tú vinnur tær. Og eg skal gera alt fyri at fáa álit, sigur Sunak.

Hann lovaði at endurreisa búskapin og at fáa tað besta burtur úr møguleikunum, sum hann heldur, at Brexit hevur givið Bretlandi.

Liz Truss og Jeremy Hunt

Jeremy Hunt, høgrumegin, sum Liz Truss, fyrrverandi forsætisráðharri, tilnevndi fíggjarmálaráðharra, heldur fram sum fíggjarmálaráðharri í stjórnini hjá Rishi Sunak. (Mynd: Ritzau Scanpix)

Hunt heldur fram 

Sunak hevur boðað frá, at Jeremy Hunt heldur fram sum fíggjarmálaráðharri. Hann tók við sessinum 14. oktober, eftir at Kwasi Kwarteng var koyrdur frá sum fíggjarmálaráðharri. 

Tað er framvegis ógreitt, um løgmálaráðharrin, Brandon Lewis, heldur fram.