Løkke er í lyklastøðu

Hvørki reyði ella blái vongur høvdu fingið meiriluta, um val var til fólkatingið í dag.

Í staðin høvdu Moderaterne, sum er nýggi flokkurin hjá fyrrverandi forsætisráðharranum, Lars Løkke Rasmussen, endað í lyklastøðu. 

Tað vísir nýggjasta kanningin hjá Voxmeter, sum er gjørd fyri Ritzau. Talan er eisini um seinastu kanningina hjá stovninum fyri valið í Danmark 1. november. 

Mette Frederiksen - Mynd: RitzauScanpix

Mette Frederiksen, forsætisráðharri. (Mynd: Ritzau Scanpix)

Hjálp frá Løkke

Reyði vongur fær 83 tingfólk, meðan blái vongur fær 71 tingfólk. Sostatt noyðast báðir veingir at fáa hjálpandi hond frá Lars Løkke Rasmussen, um teir skulu fáa tey 90 tingfólkini, sum eru neyðug fyri at fáa ein meiriluta á Fólkatingi. 

Moderaterne fáa í kanningini 11,5 prosent av atkvøðunum, ella 21 sessir. 

Meðan tað gongur rættiliga væl hjá Moderaterne, er støðan júst tann øvuta hjá teimum Konservativu.

Í summar vístu veljarakanningar, at flokkurin kundi gerast størsti flokkur á bláa veingi, men nýggja veljarakanningin gevur teimum einans seks prosent. Tað eru 0,6 prosentstig minni enn á seinasta fólkatingsvali.

Jakob Ellemann-Jensen - Mynd: Ritzau Scanpix

Jakob Ellemann-Jensen, formaður í Vinstra. (Mynd: Ritzau Scanpix)

DF og Alternativið úr Fólkatinginum

Á reyða veingi er Radikali flokkurin eisini í tungum sjógvi. Flokkurin, sum noyddi Mette Frederiksen, forsætisráðharra, at útskriva nýval, fær sambært nýggju kanningini einans 3,8 prosent, sum er helmingurin av tí, flokkurin fekk á seinasta vali. 

Støðan er kortini betri enn hjá Danska fólkaflokkinum og Alternativinum. Í nýggju kanningini fáa teir báðir flokkarnir ávikavist 1,9 prosent og 1,7 prosent. Og av tí at tinggáttin er tvey prosent, merkir tað, at næsta vikan kann vera tann seinasta hjá teimum á Fólkatingi. 

Kanningin er gjørd frá 22. til 24. oktober, og 1.004 fólk vóru spurd. 

morten messerschmidt

Frítekst tagging: 

morten messerschmidt

Morten Messerschmidt, formaður í Danska fólkaflokkinum.