Zelenskyj fekk lógvabrestir í týska samveldistinginum

Rungandi lógvabrestir vóru í týska samveldistinginum fyri ukrainska forsetanum, Volodymyr Zelenskyj, í dag, tá hann helt røðu á netinum, men Zelenskyj nýtti høvið at harta týskarar.

- Vit stríðast fyri lívinum og frælsinum. Ein múrur gongur gjøgnum Evropa. Tað er ikki ein Berlin-múrur, men ein múrur millum frælsi og trælaband. Múrurin verður størri og hægri fyri hvørja bumbu, sum dettur yvir Ukraina, segði Zelenskyj við týska samveldistingið, sambært norska TV2.

Hann takkaði Týsklandi fyri hjálpina, sum Ukraina hevur fingið hesar tríggjar vikurnar síðani innrásina, men segði, at hjálpin kom ov seint.

Hann sigur, at russiskar deildir stóðu við úkrainska markið langt undan innrásina, men ríkisleiðarar í Vesturheiminum vóru ov seinir og gjørdu ikki nóg mikið fyri at ræða Russland burtur.

- Tit hugsaðu bara um búskapin, segði Zelenskyj.

Handilsáhugamál

Zelenskyj fanst eisini at politikarum fyri týsku handilsáhugamálini í Russlandi.

- Vit síggja, at tit vilja halda fram við samhandli við Russland, nú eru vit miðskeiðis í einum køldum kríggi. Og tað hava tit ikki dugað at sæð, segði hann.

- Tit krógva tykkum aftan fyri ein vegg, so at tit ikki síggja, hvussu vit hava tað. 

Zelenskyj heldur, at týskarar mugu seta strangari tiltøk í verk móti Russlandi. 

- Friður hevur størri týdning enn inntøkur, segði Zelenskyj.

SÍ VIDEOBROT FRÁ AP-TÍÐINDASTOVUNI ÚR TÝSKA SAMVELDISTINGINUM: