Sverri, Hávard og Elias kunnu gerast ítróttanavnið 2021

Ítróttanavnið 2021 verður ein rógvari, paraíðkari ella hondbóltsspælari.

Olymiski paratleturin, Hávard Vatnhamar, hondbóltsúrmælingurin, Elias Ellefsen á Skipagøtu, og Sverri Sandberg Nielsen, olympiskur finaluluttakari í rógving, eru í uppskoti til heiðurin sum Ítróttanavnið 2021, sum er ein av heiðurslønunum á Ítróttafagnaðinum leygarkvøldið 5. februar.

Hávard Vatnhamar umboðaði Føroyar í maraton í Paralympisku leikunum í Tokyo í summar. Paraíðkarin skuldi eftir ætlan kappast í triathlon, men tá korona gjørdi tað ógjørligt, skifti hann ítróttagrein til para-maraton, og fullførdi sín dreym um at bera Merkið um paralympisku mállinjuna.

Elias Ellefsen á Skipagøtu hevði eitt gott 2021 í hondbóltsvøllum bæði í Føroyum og uttanlands. Í vár spældi hann sín fyrsta landsdyst og er longu nú týdningarmesti spælarin í hvítum. Í felagið sínum, IK Sävehof, vann hann svenska meistaraheitið í fyrstu royndini, og hevur spælt ein alsamt størri leiklut á liðnum, sum hetta kappingarárið hevur staðið seg væl í European League.

Sverri Sandberg Nielsen hevur í fleiri ár prógvað, at hann telist millum sterkastu rógvararnar í heiminum. Hann náddi í ár sínum stóra máli um at kappast í Olympisku Leikunum, sum vóru í Tokyo eitt ár seinni enn ætlað. Í harðari kapping róði miðvingurin seg til eitt fjórða pláss.

Ítróttanavnið fær umframt heiðurin eisini 5.000 krónur í gávu. Ítróttafagnaðurin 2021 verður sendur beinleiðis í sjónvarpinum hjá Kringvarpi Føroya leygarkvøldið 5. februar, kl. 20:00.