KAF: Lønin einsamøll loysir ikki starvsfólkatrotið

Kommunala arbeiðsgevarafelagið hevur gjørt vart við seg, nú Heilsuhjálparafelagið fyrr í vikuni segði, at miðal mánaðarlønin hjá heilsuhjálparum var í fjør beint yvir 15.000 kr. 

Kommunala arbeiðsgevarafelagið sigur, at endalønin hjá heilsuhjálparum er góðar 27.000 kr. um mánaðin umframt 15 prosent í eftirløn.

Felagið sigur um miðallønina hjá heilsuhjálparum og heimahjálparum, sum starvast á eldraøkinum, at fjórði hvør fekk meira enn 23.600 kr. um mánaðin umframt eftirløn, og helvtin fekk meira enn 20.600 kr. um mánaðin umframt eftirløn í fjør.

Samráðingar eru millum Heilsuhjálparafelagið og Kommunala arbeiðsgevarafelagið í løtuni.

Lønin loysir ikki alt

Arbeiðsgevarafelagið heldur, at partarnir eiga at kanna møguleikarnar fyri at fáa heilsuhjálparar og heimahjálparar settar í starv við hægri ella við fullum arbeiðsbrotparti.

Men felagið heldur, at lønin einsamøll loysir ikki stóra starvsfólkatrotið. Arbeiðsumstøðurnar telja eisini.

Tað undrar Kommunala arbeiðsgevarafelagið, at Heilsuhjálparafelagið fer til Fíggjarmálaráðið at viðgera støðuna á eldraøkinum, sum er eitt sáttmálaøki, sum kommunurnar varða av.

9,4 mió. kr.

Tað hevði kostað 9,4 milliónir krónur, um allir heilsuhjálparar fingu tað sama í mánaðarløn, sum miðallønin er í almenna geiranum. 

Heilsuhjálparafelagið hevur verið í Fíggjarmálaráðnum við hesum boðskapi.