Sjónvarpsstøðir góvust at senda frá rættarfundi

Ein dómstólur í Noregi viðger í dag umbønina hjá norðmanninum, Anders Behring Breivik, um at sleppa úr fongslinum.

Fleiri norskar sjónvarpsrásir boðaðu frá, at tær fóru at senda frá rættarfundinum, har Breivik, sum er dømdur fyri yvirgang, fekk høvi at siga sína hugsan og grundgeva fyri, hví hann eigur at verða latin leysur. Tað fekk hann tríggjar tímar til at gera.

M.a. norska TV2 sendi frá rættarfundinum, men forskotið. 

Men Breivik hevði bert havt orðið í fá sekund, tá ið TV2 gjørdi av at sløkkja ljóð og mynd frá Skien-fongslinum, har rættarfundurin varð hildin. 

- Vit senda ikki meira frá rættarfundinum orsakað av tí propaganda, sum Breivik bar fram í byrjanini, varð sagt. 

Vitleyst

Dómarin royndi eisini at avmarka frágreiðingina hjá Breivik til at snúgva seg um tað, sum rættarmálið snýr seg um, skrivar TV2.

- Breivik brúka frágreiðingina til propaganda, og tað er vitleyst og gevur okkum minni møguleika at seta hetta í ein samanhang. Vit senda redigeraðar upptøkur, sigur Karianne Solbrække, tíðindaredaktørur í TV2.

Anders Behring Breivik og atsókn - Mynd: RitzauScanpix

Anders Behring Breivik søkti fyrst at stjórnarbygninginum í Oslo, áðrenn hann fór at skjóta frá hond eftir ungfólki á Utøya. (Mynd: RitzauScanpix)

Breivik hevur sitið 10 ár av dóminum, sum hann fekk, og tí kann hann søkja um at verða latin leysur.

Hann var fyri 10 árum síðani dømdur at sita í 21 ár í fongsli eftir álopið á Utøya og atsóknina at stjórnarbygningum í Olso. Tilsamans 77 fólk lótu lív í atsóknini 22. juli í 2011.

Viðgjørt í tríggjar dagar

Rætturin fer at umrøða málið í tríggjar dagar, og skal m.a. taka støðu til, um Breivik framvegis er so vandamikil, at samfelagið skal verjast fyri honum, og at hann tí skal verða verandi í fongslinum.

Advokaturin hjá Breivik segði undan rættarfundinum í dag, at Breivik hevði fyrireikað seg væl til viðgerðina í rættinum, og hvat hann fór siga.