Íslendingar leingja koronutiltøk

Nógva smittan í Íslandi hevur við sær, at koronuavmarkingarnar verða longdar tríggjar vikur.

Tað hevur Willum Thor Thorsson, heilsumálaráðharri, boðað frá. 

Avmarkingarnar vóru settar í gildi stutt fyri jól og skuldu galda til í dag. Men nú eru tær longdar og verða galdandi til fyrst í februar.

Avmarkingarnar bera millum annað við sær, at ikki fleiri enn 20 fólk kunnu savnast, og avmarkað er, hvussu nógv fólk kunnu sleppa í venjingarhøli og svimjihallir samstundis.

Mat- og skeinkistøð skulu eisini lata aftur í seinasta lagi klokkan 10 á kvøldi.