Grønlendsk børn fáa ikki endurgjald

Danski staturin fer ikki at rinda seks grønlendskum fólkum endurgjald. Tey vóru tikin frá familjum sínum og send til Danmarkar í 1951.

Danska almannamálaráðið hevur nú víst endurgjaldskravið frá sær, sigur sakførarin hjá teimum seks fólkunum, Mads Pramming, sambært heimasíðuni hjá danska kringvarpinum.

- Vit hava nú fingið boð um, at tey vísa endurgjaldskravinum aftur, og vit mugu í rættin, um vit halda fast um endurgjaldskravið. Tí stevna vit í dag danska forsætismálaráðnum, sigur Mads Pramming.

Uppalast sum donsk børn

Tey seks grønlendsku fólkini vóru partur av eini roynd, har 22 grønlendsk børn vóru tikin frá familjum ella barnaheimum, og send til Danmarkar í eitt ár, har tey skuldu uppalast sum donsk børn, áðrenn tey vóru send aftur til Grønlands.

Bert seks av teimum 22 eru framvegis á lívi.

Frederiksen: Orsaka

Í desember í fjør bað Mette Frederiksen, forsætismálaráðharri, tey seks um umbering fyri at hava verið við í hesi royndini.

Mette Frederiksen segði, at fyrilitini fyri teimum sum menniskju vóru sett til viks. 

Í heyst kunngjørdu tey seks fólkini, at tey kravdu danska statin eftir 250.000 krónum í endurgjaldi fyri at hava verið við í uppalingarroyndini.