Ríkisveitingin og makrelur til útróðrarflotan í tinginum í dag

Løgtingið fer í dag at atkvøða um uppskotið hjá Tjóðveldi um at minka donsku ríkisveitingina til Føroya.

Samgonguflokkarnir og Javnaðarflokkurin í fíggjarnevndini mæla frá at samtykkja uppskotið.

Meirilutin sigur í álitinum, at skulu vit framhaldandi kunna bjóða okkara borgarum bestu tænasturnar, er tað ein fortreyt, at inntøkugrundarlagið ikki versnar munandi, sum hetta uppskotið leggur upp til.

Tjóðveldi í nevndini tekur undir við uppskotinum. 

Makrelur til útróðrarflotan

Á tingfundinum í dag fer Jacob Vestergaard, landsstýrismaður, eisini at svara einum skrivligum fyrispurningi frá Edvu Jacobsen í Sambandsflokkinum um makrelkvotu til útróðrarflotan.

Edva Jacobsen spyr, nær landsstýrismaðurin í fiskivinnumálum fer at leggja fram uppskot um broytingar í sjófeingislógini, so útróðrarflotin fær part í útlutanini av makrelkvotum.

Tá spurningurin er svaraður, fer løgtingið at umrøða hann.

Tingfundurin í dag verður klokkan 13.

Høgni Hoydal, Páll á Reynatúgvu