Farmaleið má taka trýstið av Smyrli

Tað sigur stjórin á Strandferðsluni, nú Smyril oftari og oftari er ov lítil til tørvin.

 

Hóast flestu eru samd um, at okkurt má gerast við trupulleikan, so er enn eingin ítøkilig loysn á borðinum, ásannar Hilmar Eliasen

 

Í lesarabrævi ídag vísir Bjarni Hammer, løgtingsmaður fyri Javnaðarflokkin, á stóra trupulleikan á Suðuroyarleiðini.

 

Hann minnir á ein fund í november í fjør, tá øll vinnan í Suðuroynni savnaði avvarðandi myndugleikar og politisku skipanina, og har tað staðiliga bleiv víst á áhaldandi og vaksandi trupulleikan við at fáa farm til og frá Suðuroynni. Partarnir samdust um, at ein varandi loysn skuldi finnast beinanvegin.

 

-Suðuroyggin skal hava eitt eyka skip inn at stuðla Smyrli beinanvegin. Alt annað er órættvíst fyri fastbúgvandi, vinnu og ferðafólk, skrivar løgtingsmaðurin í lesarabrævi ídag.

 

Strandferðslustjórin er samdur. Loysnin er at fáa eitt farmaskip á leiðina, sum kann taka trýstið av Smyrli.

 

-Enn er ov tíðliga at siga, hvat ein slík loysn vil kosta. Tað valdast, hvat fyri skip politiska skipanin ynskir, sigur Hilmar Eliasen, sum í næstum fer á fund við Fíggjarmálaráðið um málið.

 

Sambært Hilmari Eliasen kann Strandferðslan antin sjálv reka eina slíka farmaleið, ella gera tað í samstarvi við eina privata fyritøku. Og av tí at talan er um eitt farmaskip - og ikki eitt ferðafólkaskip - so er munandi skjótari og lættari at útvega eitt skip og fáa øll neyðug loyvi uppá pláss, so skjótt politiska skipanin játtar pengarnar: