Fleiri tikin fyri rennistrongsvanlukku

Italska løgreglan sigur seg hava varhugan av, at eitthvørt varð gjørt við neyðbremsuna á einum rennistrongi, sum datt niður sunnudagin, og sum gjørdi av við 14 fólk.

Trý fólk eru tikin í málinum, upplýsir løgreglan, fyri tíðindastovuni, Ansa, sum Ritzau endurgevur.

Sambært ákæranum eru tey trý fólkini, verkfrøðingurin, stjórin og rakstrarstjórin skuldsett fyri óviljað manndráp, tí kanningar hava víst, at eitthvørt varð gjørt við trygdarbremsurnar, fyri at sleppa undan seinkingum.

Vanlukkan hendi, tá ein kaðal slitnaði og lyftin datt niður í dalin. Bara ein fimm ára gamal drongur úr Ísrael kom frá hendingini á lívi.