JFK keypt gamla Akraberg

JFK Trol hevur keypt gamla trolaran, Akraberg. Umstøðurnar eru broyttar, og vit hava brúk fyri einum skipi aftrat, sigur Hanus Hansen, stjóri í JFK Troli.

Hanus Hansen vil ikki upplýsa keypsprísin fyri útvarpinum. Skipið skal nú eita Sjúrðarberg. 

Sjúrðarberg skal fiska kongafisk í Irmingarhavinum og í altjóða sjógvi norðan fyri Føroyar, og tosk í Barentshavinum.

Til fiskiskap í august

Sjúrðarberg skal saman við Gadusi fiska kvotuna hjá felagnum til nýggi Gadus kemur um góð tvey ár.

Eftir ætlan fer hann til fiskiskap í august. Og 50 fólk skulu verða við skipinum og manningarlistin er um um at vera klárur. 

Skipið varð bygd á Skála Skipasmiðju í 1987. Tað æt tá Skálafjall, seinni Beinir og í nógv ár Akraberg. Skipið varð selt av landinum í 2006.