Taka frástøðu frá kravi um vandaviðbót

Nógvir námsfrøðingar taka frástøðu frá kravinum um vandaviðbót. Føroya Pedagogfelag skuldi heldur víst samfelagssinni í hesi undantaksstøðu, stendur í almennum skrivi.

Tað er fallið fleiri námsfrøðingum fyri bróstið, at Føroya Pedagogfelag í gjár kravdi vandaviðbót til sínar limar fyri at arbeiða, meðan vandin fyri koronasmittuni er til staðar.

Tað sæst millum annað á facebooksíðuni hjá Føroya Pedagogfelag, har fleiri limir gera vart við sína ónøgd.

 >> SÍ EISINI Pedagogfelagið vil hava vandaviðbót

– Hetta taki eg ikki undir við. Eg geri gleðiliga mína samfelagsskyldu - uttan lønarískoyti, skrivar ein námsfrøðingur.

– Eg eri heldur ikki errin av at vera námsfrøðingur við slíkum úttalilsum. Hvat við at spyrja limirnar fyrst, spyr ein annar námsfrøðingur á facebooksíðuni hjá Pedagogfelagnum.

Fimm námsfrøðingar hava eisini skrivað lagt eitt skriv út á sosialu miðlarnar, har teir taka frástøðu frá kravinum hjá nevndini í Føroya Pedagogfelagi. Ein teirra er Bjarni Beder, sum í fjør sjálvur var tiltakslimur í nevndini í Føroya Pedagogfelag.

 >> SÍ EISINI Fáa ikki vandaviðbót

Við yvirskriftini "Vandaviðbót við afturvirkandi kravt, nei takk" vísa teir fimm limirinir millum annað á, at tað hevði sømt seg betur, um Føroya Pedagogfelag vísti samfelagssinni í hesari undantaksstøðu.

Ístaðin átti felagið at lagt krøvini um viðbøtur til sáttmálasamráðingarnar seinni í ár, halda teir fimm limirnir í Pedagogfelagnum.

Kringvarpið hevur biðið formannin í Føroya Pedagogfelag, Jógvan Philbrow, um viðmerkingar til málið, men hann bar seg undan á døgurða, tí hann var upptikin. Hann lovaði tó, at Pedagogfelagið letur frætta seinni í dag.