Meirkostnaðurin mettur til 102 milliónir

Eykarokningin uppá 152 milliónir krónur fyri útbyggingina av Landssjúkrahúsinum fevnir um munandi meira enn bara sjálvan H-bygningin, men meirkostnaðurin fyri hann er 102 milliónir.

Fyrr í ár segði Sirið Stenberg, undanfarna landstýriskvinna í Heilsumálum, at kostaðurin fyri H-bygnignin bleiv um 43 milliónir krónur meira enn mett.

Síðani hækkaði tað talið upp í 51 milliónir og í mai var samlaða eykarokningin komin uppá 80 milliónir. 

Samlaða dýrkingin 152 milliónir krónur

Nú er samlaða eykarokningin komin uppá 152 milliónir, og sjálvur H-bygningurin á Landssjúkrahúsinum verður 102 milliónir dýrari enn mett.

Meginparturin av meirkostnaðinum fyri H-bygningin eru, sambært Landsverki, øktar handverkaraútreiðslur, svarandi til 53 milliónir krónur, og Landverk hevur nú greinað meirkostnaðin.

Tær 53 milliónirnar til H-bygningin fevna millum annað ein feil í játtanini frá 2016, at ov lítið og skeivt varð avsett í upprunaligu kostnaðarætlanini og sparingar, sum ikki bóru á mál.

Útbyggingin komin uppá 805 milliónir

Haraftrat er meirkostnaðurin uppá 22 milliónur til ráðgeving, og 12 milliónir til eftirlit og byggileiðslu. H-bygningurin dýrkar tí úr góðum 500 til 600 milliónir.

Umframt hetta, koma kostnaðir til millum annað íbindingar og eykakrøv frá Landssjúkrahúsinum, so samlaði meirkostnaðurin fyri útbyggingina verður góðar 152 milliónir krónur.

Hetta ger, at samlaði prísurin fyri útbyggingina av Landssjúkrahúsinum í løtuni verður góðar 805 milliónir krónur.