Føroyingar merkja eisini húsagangin

Tað kann raka nakrar føroyingar, at bretska ferðaskrivstovan, Thomas Cook, er farin á húsagang - tí Thomas Cook eigur donsku ferðaskrivstovuna Spies Rejser, sum 62 Norður samstarvar við.

Nakrir føroyingar eru millum tey, sum hava keypt ferð frá Spies Rejser, og tey kunnu rokna við, at ferðin verður avlýst. Men Rejsegarantifonden tryggjar, at tey fáa peningin aftur.

– Tað sama er ikki galdandi fyri flogferðina millum Føroyar og Danmark, men um rætt verður borið at, eru teir pengarnir heldur ikki mistir, sigur Bergur Thomsen, stjóri í 62 Norður.

600.000 ferðafólk strandað

Bretskir miðlar skriva, at 600.000 ferðafólk eru strandað ymsastaðni kring heimin, og bretska stjórnin hevur sett sær fyri, at fáa teir 150.000 bretarnar aftur til hús.

Talan er um størsta flutningsátakið síðani seinna heimsbardaga, og fer at kosta bretska samfelagnum 600 milliónir pund, svarandi til umleið 5,1 milliard krónur.

– Talan er ikki um nógvar føroyingar, ið merkja støðuna, sigur Bergur Thomsen, stjóri í ferðaskrivstovuni, 62 Norður, í samrøðu við útvarpið.

 >> SÍ EISINI Bretskur ferðavinnurisi á heysin

Ferðaskrivstovan 62 Norð fer at tosa við tey, sum eru komin í knípu av, at Thomas Cook er farið á húsagang, sigur Bergur Thomsen.

– Fólk, sum eru rakt av støðuni, kunnu tosa við 62 Norð, fyri at fáa greiðu á sínum viðurskiftum, sigur Bergur Thomsen, stjóri í 62 Norður.

Fyri løtu síðani ljóðaði, at Spies Rejser kanska ikki er farið á húsagang, hóast móðurfelagið, Thomas Cook, er givið við sínum virksemi. Men tað er ikki greitt enn.