Stjórarnir fyri sjúkrahúsini settir

Landsstýriskvinnan í heilsu- og innlendismálum, Sirið Stenberg, hevur gjørt av at seta Steinar Eirikstoft í starv sum forstjóra fyri Sjúkrahúsverkið og sum nýggjan sjúkrahússtjóra á Landssjúkrahúsinum, Alexandru á Dul sum stjóra fyri sjúkrahúsverkið og sjúkrahússtjóra á Klaksvíkar Sjúkrahúsi og Hans Paula Henryson sum stjóra fyri sjúkrahúsverkið og sjúkrahússtjóra á Suðuroyar Sjúkrahúsi. Tað boðar Landssjúkrahúsið frá á heimasíðu sínari. 

Landssjúkrahúsið

Steinar Eirikstoft er 37 ára gamal, útbúgvin sivilverkfrøðingur Steinar hevur hollar royndir innan heilivágsídnaðin, harav átta ár innan leiðslu bæði frá Novo Nordisk og frá Xellia Pharmaceuticals.

Har hevur hann starvast sum leiðari og stjóri síðani november 2014. Steinar Eirikstoft tekur við starvinum 1. september 2019.

Klaksvík

Alexandra á Dul er 38 ára gomul, útbúgvin bachelor í heimspeki og búskapi og cand. merc. í Human resource management og búskapi frá Copenhagen Business School.

Alexandra hevur starvast í seks ár hjá heilivágsfyritøkuni Biofac. Seinasta árið hevur Alexandra starvast sum ráðgevi í leiðslu og organisatión í Tórshavnar kommunu. Alexandra á Dul byrjar 1. august 2019.

Suðuroy

Suðuroyar sjúkrahús fær ein skipara á brúnni. Hans Pauli Henryson er 56 ára gamal, útbúgvin skipsførari á Føroya Sjómansskúla.

Hans Pauli hevur drúgvar leiðsluroyndir frá privata arbeiðsmarknaðinum. Hann hevur útvið 20 ára royndir hjá A.P. Møller-Mærsk, har hann sigldi sum skipari í altjóða sigling í 10 ár.