Erdogan vann tryggan sigur

Turkiski forsetin, Recep Erdogan, er nú einaráðandi í Turkalandi, tí forseta- og tjóðartingsvalið í gjár gav honum stóran meiriluta. Somikið stóran, at neyðugt er ikki við einum valumfari afturat.

64 ára gamli Erdogan fekk 52,8 prosent av atkvøðunum, og tí er ikki neyðugt við einum valumfari afturat.

Búskaparliga støðan í Turkalandi er vánalig, inflatiónin er høg og gjaldoyrað, lirin, er fallin við einum triðingi seinasta árið.

Erdogan hevur sitið við valdið í 16 ár, fyrst sum forsætisráðharri og síðani 2014 sum forseti, og hann er nú valdur aftur fyri eitt fimm ára skeið.

Andstøðan stóð seg betri enn leingi, og andstøðuleiðarin, Muharrem Ince, fekk størri undirtøku enn roknað varð við. Hann fekk umleið ein triðing av atkvøðunum.

Valstríðið hevur ikki verið rættvíst, hava fleiri evropeisk lond víst á, tí Erdogan hevur fingið nógv meir tíð í almennu miðlunum, enn andstøðuleiðarin fekk.

Í fjør var fólkaatkvøða um at broyta grundlógina, so embætið sum forsætisráðharri fellur burtur, og heldur er tað forsetin, sum hevur alt valdið. Hann skal velja stjórnarlimirnar, og hann kann senda tjóðartingið heim uttan at spyrja nakran. Og hann kann eisini vera formaður í flokkinum, sum hann umboðar, og sum hevði framgongd á valinum.

Hóast endaliga valúrslitið ikki er almannakunngjørt enn, so er eingin ivi um, at Erdogan hevur vunnið, skriva tíðindastovurnar.