Russar leggja toll á amerikanskar vørur

Russland fer at leggja innflutningstoll á ávísar vørur úr USA sum aftursvar til, at USA hevur lagt toll á stál- og aluminiumsinnflutning.

Russiski búskaparmálaráðharrin, Maxim Oreshkin, boðaði í gjár frá, at Russland fer at leggja toll á ymsar vørur úr USA

Mynd: Tass

Brynhild Thomsen

20.06.2018 - 11:01

Tað boðaði russiski búskaparmálaráðharrin, Maxim Oreshkin, frá í gjár, sambært Reuters.

Russar fara at leggja toll á amerikanskar vørur, har russarar sjálvir framleiða líknandi heima í Russlandi, og Oreshkin heldur uppá, at tiltøkini ikki fara at ávirka makrobúskaparligu støðuna hjá Russlandi.

Í mars legði USA 25 % í innflutningstolli á stál og 10 % á aluminium. Eitt stig, sum fyrst av øllum hevði til endamáls at raka innflutning úr Kina.

Argentina, Australia og Brasil vórðu undantikin frá amerikanska tollinum, men Russland slapp ikki undan.

Russiskar stálverksmiðjur eru í hornatøkum við amerikanska Handilsmálaráðið um hendan tollin.

- Russland brúkar síni rættindi í Alheims Handilsstovninum, WTO, og stigini nú móti amerikanska innflutninginum taka vit fyri at fáa javnvág í, sigur russiski búskaparmálaráðharrin sambært Reuters.