Mæla til at byggja niðan fyri skúlan á Giljanesi

Sjóvinnustýrið mælir til, at bygdur verður fyrisitingarbygningur á Hillingartanga, niðan fyri skúlan á Giljanesi. 

Í sambandi við, at avgerð skal takast um staðseting, nú byggjast skal til Sjóvinnustýrið, hevur Uttanríkis- og Vinnumálaráðið heitt á Sjóvinnustýrið og Landsverk um at gera tilmæli um staðsetingina. 

Kommunurnar í Vágum hava víst á tøk grundstykki í oynni. 

Sørvágs kommuna hevur víst á eitt stykki á ídnaðarøkinum oman fyri flogvøllin, og Vága kommuna hevur boðið seks grundstykki.

Sjóvinnustýrið og Landsverk mæla til, at fyrisitingarbygningurin verður á Hillingartanga, niðan fyri skúlan á Giljanesi. 

Orsøkin til tilmælið er, at stykkið liggur tætt við sjóvarmála. Hetta tykist vera natúrlig staðseting fyri Sjóvinnustýrið.

Staðsetingin á Giljanesi hevur við sær minst møguliga koyring gjøgnum bygt øki og stytst møguliga koyritíð frá miðstaðarøkinum.

Verið í kommununi síðani 2002

Sjóvinnustýrið hevur harafturat verið í Vága kommunu síðani 2002 og hevur skapt sær samleika har. 

Í øðrum lagi mæla Sjóvinnustýrið og Landsverk til at byggja á Heimaru bryggju í Miðvági.

Poul Michelsen, landsstýrismaður, hevur biðið løgtingið um 13,7 mió. kr. at byggja Sjóvinuustýrinum nýggjan bygning.

Málið er enn í Fíggjarnevndini.

Uppskot er um at bjóða út byggingina 24.apríl. Og arbeiðið skal verða liðugt hálvan desember næsta ár.