Nýggj lóg krevur longu nú nógvar broytingar

Nú fiskivinnunýskipanin hevur virkað í 51 dagar, er neyðugt at broyta, nágreina og rætta orðingar í lógini.

Talan er um 22 broytingar í lógini um sjófeingi.

Talan er ikki um innihaldsligar broytingar, men um tekniskar tillagingar og rættingar fyri at gera lógartekstin greiðari fyri fólk og umsiting, stendur í viðmerkingum um lógaruppskotið, sum er sent til hoyringar.

Staðfest er, at í verandi lógarteksti er neyðugt at gera ávísar tillagingar og rættingar fyri at fáa ásetingarnar greiðari og neyvari. 

Tað vísir seg, at í summum førum er okkurt komið skeivt fyri, eitt nú samsvara ásetingarnar í lógini ikki við upprunaligu ætlanina. 

Ringt at umsita

Í øðrum førum eru orðingar ikki nóg neyvar og greiðar at umsita eftir. 

Aðrastaðni eru dømi um, at tá einstakar ásetingar eru broyttar, eftir at uppskotið varð lagt fram í løgtinginum, er hetta gjørt, uttan at neyðugar fylgibroytingar eru gjørdar í øðrum greinum. 

Hetta ger samanumtikið, at lógarteksturin ikki altíð hongur nóg væl saman, eins og summar lógargreinar eru orðaðar á ein hátt, sum ger tær torskildar, bæði fyri fólk yvirhøvur og tey, sum skulu umsita lógina, sigur Fiskimálaráðið. 

Til hoyringar

Uppskotið er sent til ummælis hjá Fiskivinnuráðnum, Vørn, Felagnum trolbátar og aðalráðunum.

Uppskotið er eisini á heimasíðuni lms.fo, undir lógaruppskot til ummælis.

Frestin at siga sína hugsan um uppskotið er til 26.februar, tí uppskot, sum skulu leggjast fram í hesari tingsetuni, skulu vera Løgtingskrivstovuni í hendi 28.februar.