USA og Russland samráðast

Hóast viðurskiftini millum USA og Russland eru versnað í seinastuni, hava bæði londini vilja til at samráðast.

Tað sigur russiski uttanríkisráðarrin, Sergej Lavrov, eftir ein fund við amerikanska starvsbróðurin, Rex Tillerson.

- Vit halda, at okkara amerikansku starvsfelagar eru sinnaðir at halda fram at tingast, og eftir mínum tykki er eingin annar møguleiki, sigur Lavrov.

Hittust í Manila

Hann og Tillerson hittust í gjár í sambandi við ein asiatiskan toppfund í filipinska høvuðsstaðnum, Manila.

Viðurskiftini millum USA og Russland hava ikki verið so ring síðani kalda kríggið.

Londini hava víst diplomatum hjá hvør øðrum av landinum, og fyri fáum døgum síðani skrivaði Donald Trump, forseti, undir eina lóg, sum herðir tiltøkini móti Russlandi.

Bæði Lavrov og Tillerson lótu seg avmynda saman, men teir lótu sum onki, tá teir vórðu spurdir, um nýggju amerikansku tiltøkini fara at ávirka viðurskiftini millum bæði londini.