Løgtingið fekk uppritið hjá Høgna í desember

Innanhýsis uppritið, sum varð gjørt í Fiskimálaráðnum í sambandi við uppskotið um fiskidagarnar fiskiárið 2016-2017, varð sent Landsstýrismálanevndina tann 13.desember í fjør. 

Uppritið liggur á heimasíðuni hjá nevndini. 

Tað er tí ikki loyniligt longur.

Løgtingið hevði tó ikki uppritið, tá tað viðgjørdi og avgreiddi fiskidagarnar í august í fjør.

Tað er ikki vanligt at senda innanhýsis skjøl hjá aðalráðum saman við lógaruppskotum, tá tey fara í løgtingið.

Sambært løgfrøðiliga uppritinum hjá Fiskimálaráðnum var tað ikki ognartøka at skerja fiskidagarnar og seta dagar av til tey at brúka, sum brúka allar sínar fiskidagar, áðrenn fiskiárið er liðugt. 

Landskassin hevur tí heldur onga endurgjaldsskyldu.

Høgni Hoydal, landsstýrismaður, sigur, at ognartøka er ikki partur av kæruni hjá Meginfelagi útróðrarmanna, sum hevur kært Høgna Hoydal.

Hann sigur, at í svarinum hjá honum til Landsstýrismálanevndina, sum er dagfest 6.apríl, verða allir spurningar í kæruni svaraðir. 

Einki er loyniligt, onki er fjalt fyri løgtinginum, sigur hann.

Alt er gjørt sambært vanligum mannagongdum í sambandi við at fyrireika lógaruppskot.