Leita eftir horvnum farmaskipi

Eitt stórt suðurkoreanskt farmaskip, Stellar Daisy, er horvið í Suðuratlatntshavinum. Skipið fór úr Brasil við málmi og var á veg til Kina.

Skipið sendi út neyðarkall fríggjadagin, og boðað var frá leka á skipinum. Siðani hevur eingin hoyrt nakað frá skipinum, boðar BBC frá.

Sjóverjan í Uruguay hoyrdi neyðarkallið, og setti seg í samband við fleiri onnur farmaskip á leiðini, og tey fóru at leita eftir Stellar Daisy.

22 menn saknaðir

Skipini hava boðað frá, at tey einki hava sæð, annað enn at tveir sjómenn av Filipsoyggjunum eru funnir í einum bjargibngarbáti, teir vórðu funnir leygardagin. Skipini hava samstundis boðað frá, at ramur roykur av dieselolju er á leiðini.

Eingin veit nakað um hinar 22 menninar sum vóru við skipinum, men fleiri tómir bjargingarbátar eru funnir, sigur ein talsmaður fyri suðurkoreanska uttanríkisráðið. Myndugleikarnir hava biðið um hjálp úr Uruguay og Brasil í eini roynd at finna skipið.

Skipið lastar 260.000 tons, og 16 mans av Filipsoyggjunum og átta úr Suðurkorea mannaðu skipið. Skipið var einar 1200 fjórðingar úr landi tá tað sendi út neyðarkall.