Nú verður uppskotið alment

Klokkan 14 í dag fer landsstýrið at hava tíðindafund um uppskotið til fiskivinnunýskipan. Eftir tíðindafundin verður uppskotið sent til hoyringar.

Uppskotið hjá landsstýrinum verður tó ikki tað einasta, sum kemur í Løgtingið. Eisini Sambandsflokkurin og Fólkaflokkurin fara at leggja hvør sítt uppskot um fiskivinnunýskipan fyri tingið.

Í november í fjør legði Sambandsflokkurin fram sítt boð uppá, hvussu fiskivinnunýskipanin kann síggja út. Síðani hevur flokkurin verið í samráðingum við samgonguna, men tær samráðingarnar endaðu í síðstu viku.

Skjóta upp at leingja verandi lóg

Sambandsflokkurin boðaði tá frá, at flokkurin fer at leggja sítt uppskot um fiskivinnunýskipan fram tá sjálvt lógaruppskotið er liðugt orðað. Tað arbeiðið er enn ikki liðugt. Uppskotið hjá Fólkaflokkinum byggir á søgulig rættindi og at rætta skeivleikar í verandi skipan.

Fólkaflokkurin hevur eisini latið løgtingsskrivstovuni lógaruppskot, sum einans snýr seg um at leingja verandi lóg um vinnuligan fiskiskap fýra ella trý ár. Tað skal brúkast, um ikki ber til at semjast um eina nýggja skipan fyri nýggjár.

Tíðindafundurin hjá landsstýrinum um fiskivinnunýskipanina verður í Tinganesi klokkan 14. Fundurin verður eisini stroymdur á heimasíðuni hjá Løgmansskrivstovuni lms.fo.