Fleiri skulu gera viðmerkingar

Nógvir almennir persónar, einstaklingar og felagsskapir fara næstu dagarnar at siga sína hugsan um um uppskotini at broyta hjúnabandslógina, so samkynd kunnu verða vígd borgarliga.

Nú klokkan níggju skuldi Mentanarnevndin byrjað at viðgera uppskotið, sum hevur til endamáls at sleppa fólkakirkjuni undan at víga samkynd.

SÍ EISINI Viðgera borgarliga vígslu seinni í mánaðinum

Lógin skal staðfesta, at tað framvegis bara eru fólk av ymiskum kyni, sum verða vígd ella fáa kirkjunnar vælsignilsi av hjúnabandinum.

Nevndin hevur biðið Jógvan Fríðríksson, bisp, umboð fyri kirkjuráð og samkomur, prestafelagið, lærarafelagið, pedagogfelagið, LGBT og landsstýriskvinnuna í mentamálum um at koma á fund at siga sína hugsan.

Viðgerast í fleiri øðrum nevndum eisini

Í morgin viðger Trivnaðarnevndin í Løgtinginum uppskotið um at loyva samkyndum at ganga í borgarligt hjúnalag

Mikudagin viðger Rættarnevndin uppskotið um at víðka ásetingarnar í føroysku rættargangslógini um upploysn av hjúnalagi til eisini at fevna um borgarligt hjúnalag millum tveir persónar av sama kyni.

Eisini Trivnaðarnevndin og Rættarnevndin hava biðið nógvar einstaklingar og felagsskapir um at koma á fund at siga sína hugsan um uppskotini.