Samgongutinglimur sigur nei til landingar uttanlands

Tað er sum býráðslimur á Tvøroyri, at Bjarni Hammer - saman við øllum hinum í Tvøroyrar Býráð - í hoyringssvari frá kommununi staðliliga mótmælir, at sjófeingislógin verður broytt, so skipini fáa loyvi at landa helvtini av veiðuni uttanlands.

Kommunan hevur latið sítt hoyringarsvar, nú Dennis Holm ætlar at gera fleiri broytingar í sjófeingislógini, og herfyri sendi lógaruppskot um tað til hoyringar. 

Men Bjarni Hammer er eisini løgtingslimur fyri Javnaðarflokkin. Og har ætlar hann at gera sína ávirkan galdandi. Bjarni Hammer tekur snøgt sagt ikki undir við at broyta markið fyri landingum uttanlands úr verandi 15 prosentum upp í 50 prosent.

Løgtingsmaðurin fyri Javnaðarflokkurin er av tí greiðu fatan, at samfelagið missir nógv meira enn tað vinnur við at loyva skipunum at landa helvtina av uppsjóvarfiskinum uttanlands. Og tí tekur hann als ikki undir við uppskotinum hjá landsstýrismanninum.

Ætlaðu broytingarnar í sjófeingislógini hava verið til hoyringar, men enn hevur landsstýrismaðurin ikki borið tær í løgtingið.

Hoyr innslag: