Nú sært tú áhugamálini hjá landsstýrisfólkunum

Landsstýrisfólk skulu nú almannakunngera persónlig áhugamál og ognarviðurskifti. Skipanin skal tryggja størri gjøgnumskygni, sigur løgmaður

Poul Michelsen eigur millum annað partapening í P/f Poul Michelsen, og partabrøv í BankNordik. Áhugamálini og ognarviðurskiftini hjá landsstýrisfólkunum eru nú kunngjørd

Beinta Løwe

Bjarni Mohr

14.01.2016 - 11:41

Poul Michelsen, landsstýrismaður í Vinnumálum, eigur 12 prosent av partapenigninum í P/f Poul Michelsen, sæst í listanum, ið er kunngjørdur.

Hann eigur eisini 55 prosent av partapeninginum í PM Holdning, sum aftur eigur 46 prosent av partapeninginum í P/f Poul Michelsen.

Les um øll áhugamálini og ognarviðurskiftini hjá landsstýrisfólkunum á slóðini her: Persónlig áhugamál og ognarviðurskifti

Í yvirlitinum sæst eisini, at Poul Michelsen eigur 476 partabrøv í BankNordik, og at hann er limur í millum annað HB og Sílaveiðufelagnum.

Rigmor Dam, landsstýriskvinna í mentamálum, eigur 50 partabrøv í Atlantic Petroleum og 75 partabrøv í BankNordik. Hini landsstýrisfólkini eiga ikki partabrøv, sambært yvirlitinum.

Høgni Hoydal er limur í Grindamannafelagnum og H71, Henrik Old hevur verið á makrelfeltinum í 2011, og hevur eisini tikið móti makreli frá føroyskum trolarum, og er limur í VB og FC Suðuroy, sambært yvirlitinum.