Viðgera borgarliga vígslu seinni í mánaðinum

Allar tríggjar tingnevndirnar, sum hava uppskotini um at loyva samkyndum at blíva borgaraliga vígd, hava fund seinni í januar

Tær tríggjar nevndirnar í Løgtinginum, ið hava uppskotini um at loyva borgarligari vígslu, fara á fundum seinni í januar at viðgera uppskotini um at loyva borgarligum vígslum

Høgni Djurhuus

Bjarni Mohr

06.01.2016 - 17:51

Mentanarnevndin hevur fund 18. januar. Nevndin skal viðgera uppskotið, sum staðfestir, at bara hinskynd hava rætt til at verða vígd ella fáa hjúnabandið signað í kirkju.

19. januar hevur Trivnaðarnevndin fund. Trivnaðarnevndin hevur uppskotið um at broyta hjúnabandslógina, so samkynd kunnu verða borgaraliga vígd. Hetta er ein donsk lóg, tí málsøkið er ikki yvirtikið.

Hava boðið ymiskum umboðum á fund

20. januar hevur Rættarnevndin fund. Nevndin viðger uppskot um ríkislógartilmæli um at broyta rættargangslógina, so samkynd kunnu skiljast.

Rættarnevndin hevur biðið Jógvan Fríðriksson, biskup, umboð fyri samkomur, Dan Knudsen, ríkisumboðsmann, Henrik Møller, sorinskrivara, John Kølbæk, fúta, LGBT og Aksel V. Johannesen, løgmann, koma á fundin.

Løgtingskvinnurnar Sonja J. Jógvansdóttir, Bjørt Samuelsen, Hanna Jensen og Kristianna Winther Poulsen hava lagt fram tey trý uppskotini, sum skulu rudda slóð fyri, at samkynd kunnu blíva borgaraliga vígd. Fyrsta viðgerð var í løgtinginum 24. november.