Flokkarnir fáa kanska meira pening

Ein samd fíggjarnevnd mælir í fíggjarlógarálitinum til at hækka játtanina til studning til politiskt virksemi og upplýsing úr 4,2 milliónum til 4,8 milliónir krónur.

Pengarnir, ið verða býttir millum flokkar eftir atkvøðutali seinasta løgtingsval, skulu nýtast til at styrkja politiska arbeiðið og politiska upplýsing.

Studningurin, ið verður útgoldin mánaðarliga, kann millum annað verða nýttur til at reka poltiskar flokkar, skeið- og fundarvirksemi og blaðútgávu við.

Stuðulin tvífaldaður eftir tveimum árum

Verður tilmælið hjá samdu fíggjarnevndini samtykt, hevur Løgtingið tvífaldað studningin til sín sjálvs síðani 2013, tá játtanin var slakar 2,4 milliónir krónur.

Umsitingin hjá Løgtinginum kann eisini gleða seg um, at Fíggjarnevndin hevur verið inn yvir upprunaliga fíggjarlógaruppskotinum og mælir til broytingar.

Ein samd fíggjarnevnd mælir til at hækka rakstrarjáttanina til løgtingsarbeiði við sløkum 4,5 milliónum krónum. Hetta er gjørt í samráð við løgtingsformannin, stendur í álitinum.