Eykajáttanarlógin skorin til

Fíggjarnevndin hjá Løgtinginum hevur nú skorið eykajáttanarlógina hjá landsstýrinum til, so pengar, sum ikki verða brúktir í ár, fara úr lógini og í fíggjarlógina fyri 2016 í staðin fyri.

Hóast eykajáttanarlógin var samtykt eftir aðru viðgerð, vildi minnilutin í Fíggjarnevndini hava hana aftur í nevndina, tí minnilutin, andstøðan, heldur, at landsstýrið brýtur játtanarlógina við eykajáttanarlógini.

Minnilutin vísti til upprit

Landsstýrið flytur pengar, sum ikki verða brúktir fyrr enn næsta ár, til í ár, segði minnilutin. Minnilutin vísti í tí sambandi til eitt upprit, hann fekk frá umsitingini hjá løgtinginum.

Í gjár samtykti Løgtingið so eftir triðju viðgerð eykajáttanarlógina við øllum 28 atkvøðum, sum vóru í salinum.

Tað gjørdi tingið eftir at hava samtykt eitt uppskot frá samdari Fíggjarnevnd um, at nevndin fer í álitinum um fíggjarlógina fyri 2016 at seta tær játtanir, sum ikki verða brúktar í 2015. Tær verða tí tiknar úr eykajáttanarlógini fyri 2015.

Tvey uppskot feld

Løgtingið feldi uppskot frá tingmonnum í Fólkaflokkinum, Sambandsflokkinum og Miðflokkinum um at byggja nólsoyarferjuna nú.

Eitt uppskot frá tingfólki í Fólkaflokkinum og Sambandsflokkinum um ikki at keypa fleiri bygningar til tað almenna, fall eisini.

Tingfólkini siga, at ein loysn kundi verið at savna øll aðalráðini í einum og sama bygningi, og innrætta bygningin soleiðis, at ikki slepst undan, at starvsfólkini arbeiða saman.