Sáttmálar komnir undir land

Nú skjótt fimm mánaðir eru farnir, síðani sáttmálarnir millum manningarfeløgini og Reiðarafelagið fóru úr gildi, eru nýggir sáttmálar ikki gjørdir enn.

Men nú nærkast, ið hvussu so er við Fiskimannafelagnum og Maskinmeistarafelagnum, sigur Herálvur Joensen, stjóri í Reiðarafelagnum.

- Eg haldi, at eg kann siga, at vit eru heilt tætt við, sigur Herálvur Joensen.

Samráðingarnar millum Reiðarafelagið og Skipara- og navigatørfelagið eru ikki komnar so langt sum hinar, tí tær byrjaðu seinni.

Fundur var mánadagin millum Reiðarafelagið og Skipara- og navigatørfelagið, og fundur verður aftur í morgin, sigur Herálvur Joensen.