FM í súkkling: Gunnar Dahl Olsen í besta formi

<p>FM í einkultstarti var í gjárskvøldið. Tað varð súkklað í tveimum bólkum. Annar bólkurin var ein opin bólkur, har teinurin var 40 km. Seinni bólkurin var fyri kvinnur, unglingar og motionistar har teinurin var 20 km.</p>

<p>Allir súkklararnir byrjaðu í hósvík og komu á mál aftur í hósvík. Opni bólkurin súkklaði til Svínáir at venda, meðan kvinnur, unglingar og motionistar vendu við rundkoyringina omanfyri streymin.</p>

<p>Súkklararnir vóru moyrir í beinunum tá teir skuldu byrja, tí kvøldið fyri høvdu súkklararnir súkklað FM í landavegssúkkling 100 km, sum er ein teinur tvær ferð runt oyggjarvegin.</p>

<p><strong>Gunnar í toppformi</strong></p>

<p>Gunnar Dahl Olsen, sum telist millum teir eldru súkklararnar vísti seg at vera í allar besta formi. Hann vann bæði FM í 100 km og í einkultstartinum var hann síðsti maður avstað, men fyrsti maður á mál. Nummar tvey gjørdist Jóanis Albert Nielsen, og Gudmundur Joensen gjørdist mummar trý.</p>

<p><strong>Eingin kapping hjá Elsu</strong></p>

<p>Elsa Berg var einasti luttakarin fyri kvinnur, men hóast at eingin kappingarneyti var hjá henni, so súkklaði hon væl. Elsa Berg tekur seg nógv fram sum súkklari, og hevur sett sær sum mál at koma á oyggjaleikalandsliðið, sum skal til Jersey næsta summar. Tað eru fleiri kvinnur, sum súkkla. Men í einkultstartinum var tað bert Elsa Berg, sum lúttók.&nbsp;</p>

<p>Í kvøld skulu skulu súkklararnir royna seg í FM í býarkoyring. Byrjað verður hjá Wensel í Akranesgøtu og har er málið eisini.</p>

<p><strong>Oyggjaleikalandsliðið&nbsp;</strong></p>

<p>Tað styttist til Oyggjaleikirnar á Jersey, og FM kappingarnar 2014 er umframt ein kapping um føroyska meistaraheitið, eisini ein av trimum úttøkukappingum til plássini á føroyska súkklulandsliðnum.</p>

<p>Volvo kring Føroyar var ein úttøkukapping, og nú eru tað FM kappingarnar og í vár verður so triðja og seinsta úttøkukappingin.</p>

<p>Í apríl skal listin latast inn um hvør skal umboða oyggjaleikalandsliðið á Jersey í summar. Av tí at fleiri av súkklarunum eru útisetar, og ikki luttaka til FM kappingarnar, so kann tað henda seg at ein av teimum allar bestu súkklarunum, Torkil Weyhe ikki verður úttikin.</p>

<p>Tí verða útisetarnir noyddir&nbsp;at luttaka í vár til seinastu kappingina og fáa eitt gott pláss, um teir skulu tryggja sær eitt pláss á landsliðnum til oyggjaleikirnir.</p>

<p>Oyggjaleikalandsliðið hjá súkklarunum telur 10 fólk. Fimm kvinnur og fimm menn.</p>

<p><strong>Tíðirnar</strong></p>

<p><strong>Menn 40 km:</strong></p>

<p>Gunnar Dahl Olsen 0.56.44</p>

<p>Jóanis Albert Nielsen 1.00.05</p>

<p>Gudmundur Joensen 1.01.12</p>

<p>Hilmar Hansen 1.06.52</p>

<p>
<strong>Kvinnur 20 km.</strong></p>

<p>Elsa Berg 0.43.45</p>