Visit Faroe Islands sleppur undan fyrisitingarlóg

Almenningurin og fjølmiðlar fáa innlit í nýggjasta almenna partafelagið. Lógin um innlit í fyrisitingina er galdandi fyri felagið, P/F Visit Faroe Islands, stendur í grein 6 í lógaruppskotinum. 

Tað er fyri at tryggja almenninginum innlit í virksemi felagsins, sum verður fíggjað við játtan í fíggjarlógini, sigur Johan Dahl, landsstýrismaður í vinnumálum.

Men fyrisitingarlógin og lógin um Løgtingsins umboðsmann vera ikki galdandi fyri felagið. 

14 mió árliga

Uppskotið um at umskipa Ferðaráðið til almenna partafelagið Visit Faroe Islands er komið í løgtingið.

Johan Dahl, landsstýrismaður, biður tingið um loyvi til at seta hálva millión úr landskassanum í partapeningi í nýggja felagið. 

Harafturat skal stuðul til raksturin, 14 milliónir krónur um árið, vera í fíggjarlógini. 

Málið er tvífalding

P/F Visit Faroe Islands skal yvirtaka rættindi og skyldur, sum starvsfólkini hjá Ferðaráðnum hava yvirtøkudagin. Yvirtøkudagurin er dagurin, tá felagið er skrásett í partafelagsskránni hjá Skráseting Føroya.

Lógin um at gera Ferðaráðið til alment partafelag kemur í gildi dagin eftir, at hon er kunngjørd. Sama dag fer lógin um Ferðaráð Føroya frá 2011 úr gildi, og Ferðaráð Føroya og Ráðið fyri Ferðaráð Føroya verða tikin av. 

Málið er, at ferðavinnan skal tvífaldast og geva minst eina milliard kr. í umsetningi í 2020. Og arbeiðsplássini skulu tvífaldast og vera 800 til 1000 um seks ár.