Ikki fleiri skúlaheim

Brúk verður ikki fyri fleiri skúlaheimum í Havn, tá Marknagilsdepilin er liðugur.

Fleiri næmingar vera ikki í Marknagilsdeplinum enn nú eru í Hoydølum, Tekniska skúla og Handilsskúlanum.

Skúlaheimini í Havn eru fullsett, men sera fá eru á bíðilista. Tí fer tørvurin á skúlaheimsplássum neyvan at vaksa í fyrsta umfari.

Tað sigur Bjørn Kalsø, landsstýrismaður, í svari til Gunnvør Balle, løgtingskvinnu.

Bjørn Kalsø sigur eisini, at skúlaheimið í Børkugøtu í Havn varð selt á tvingsilsuppboði í fjør.

Men áðrenn tað hendi, stóð bæði Fróðskaparsetrinum og Skúlanum í Hoydølum í boði at taka við skúlaheiminum í Børkugøtu. Hvørgin tók av.

Skúlin í Hoydølum metti seg ikki at hava brúk fyri skúlaheiminum.

Bjørn Kalsø sigur, at ikki er avgjørt, hvat verður gjørt við Skúlaheimið í Marknagili.

Sjálvsognarstovnurin, sum varðar av Tekniska Skúla í Tórshavn, eigur Skúlaheimið.

Sambært avtalu verður tað latið sum partur av Skúladeplinum.

Áðrenn nøkur avgerð verður tikin um at broyta skúlaheimini í Havn, verður fyrst kannað, hvør tørvurin er og hvørji krøv, bústaðir hjá lesandi skulu lúka, sigur landsstýrismaðurin í svari sínum.