Hava givið leyst at fiska makrel

Á midnátt varð givið leyst at fiska av felagskvotuni av makreli, og umleið 11.500 tons eru eftir at fiska, upplýsir Fiskimálaráðið.

Í kunngerðini um makrelfiskiskapin stendur, at um makrelur er eftir á felagskvotuni 1. september, sleppa øll skip framat at fiska kvotuna, sama hvussu hámarkið hevur verið.

Tað merkir, at avmarkingar millum skipabólkarnar og hámarkið fyri einstøku skipini, sum fiska av felagskvotu eftir makreli, nú eru burtur. Fiskifør, sum hava fingið útskrivað fiskiloyvi til at fiska av felagskvotu eftir makreli, nýtast tó ikki at fáa nýtt fiskiloyvi útskrivað.

Kvotan var 61.500 tons

Útskrivaða fiskiloyvið til makrel gevur frá 2. september rætt til at fiska makrel av eini felagskvotu upp á 61.500 tons, tó so, at tað, sum til og við 1. september er fiskað av felagskvotunum, verður roknað frá.

Fiskiskapurin av felagskvotuni eftir makreli verður steðgaður, tá felagskvotan upp á 61.500 tons er uppfiskað. Sambært upplýsingum frá Fiskiveiðieftirlitinum vórðu góð 50.000 tons veidd av felagskvotuni tann 30. august.

11.500 tons eftir

Sostatt eru góð 11.500 tons eftir. Fyrivarni skal takast fyri, at tølini broytast dagliga. Broytingin hevur ikki týdning fyri skip, sum hava fiskiloyvi til at fiska makrel av eginkvotu, tað eru nótaskipini. Boðini standa á heimasíðuni hjá Fiskimálaráðnum, fmr.fo.