Of Monsters and Men høvuðsnavn á G! 2024

G! festivalurin hevur júst kunngjørt í bæði Góðan morgun Føroyar og á sínari egnu heimasíðu, at heimskendi íslendski fólkarokkbólkurin Of Monsters and Men verður eitt av høvuðsnøvnunum á G! 2024. 

"Fyri G! er Of Monsters and Men hin fullkomna bókiningin. Talan er um ein norðurlendskur bólkur í heimsflokki, ið er tiltikin góður á pallinum. Men talan er eisini um ein bólkur við listarligari sameining og tónleiki, ið fangar áhoyrarar í øllum aldursbólkum," skrivar G! festivalurin á heimasíðuni. 

Of Monsters and Men fekk sítt heilt stóra gjøgnumbrot við sanginum "Little Talks", ið gjørdist eitt heimshitt, og sum í løtuni hevur útvið eina milliard spælingar á Spotify. 

"Little Talks" er at finna á debutplátuni hjá Of Monsters and Men, "My Head is an Animal", sum kom út í 2012 og eisini fostraði hitt sum "Dirty Paws", "King and Lionheart" og "Mountain Sound".

Síðani gjøgnumbrotið hevur Of Monsters and Men givið fleiri plátur út og spælt kring allan heimin. 

Í 2022, tá Of Monsters and Men kundu hátíðarhalda 10 ára dagin fyri gjøgnumbrotinum, ferðaðist stóra morgunsendingin CBS Saturday Morning til Íslands at hitta limirnar í bólkinum. 

Burturúr spurdist eitt hugtakandi portrett av bólkinum, sum næsta summar kemur á vitjan í Føroyum. 

Við í Of Monsters and Men spæla: 

• Nanna Bryndís Hilmarsdóttir
• Ragnar Þórhallsson
• Brynjar Leifsson
• Kristján Páll Kristjánsson
• Arnar Rósenkranz Hilmarsson

G! festivalurin 2024 verður fyriskipaður í døgunum 18. til 20. juli.