Almennir bygningar leggja um til grøna orku

Meginparturin av bygningunum, sum landið eigur, verður hitaðiurvið brenniolju. Tað merkir, at tað almenna er millum størstu brennioljubrúkarar í landinum  

Eitt av høvuðsmálunum hjá samgonguni er at fremja grøna orkuskiftið, og á fíggjarlógini fyri í ár eru fimm mió. kr. játtaðar til grønar orkuloysnir í bygningunum hjá landinum.

- Játtanin verður næstaár hækkað upp í 7,5 mió. kr., og hóast upphæddirnar ikki eru stórar, so gera tær veruliga mun, sigur Dennis Holm, landsstýrismaður. 

Landsverk hevur uppgávuna at fremja orkuskiftið í bygningunum hjá landinum. 

Landssjúkrahúsið og Eirargarður

Næsta ár er ætlanin, at Landssjúkrahúsið, sum er ein av størstu oljubrúkarunum á landi, og flestu bygningar á Eirargarði, skulu leggja um til fjarhita. 

Landið sparir tá umleið eina mió. litrar av olju um árið, og føroyska CO2-útlátið minkar við umleið 2.650 tonsum.

Í ár eru orkuloysnir í 10 av landsins bygningum verksettar ella undir fyrireiking. Væntandi verða tær klárar at brúka í ár og næsta ár.

Ætlaðu orkuumleggingarnar í ár og næsta ár svara til umleið 40 prosent av samlaðu oljunýtsluni í almennu bygningunum hjá landinum, skrivar Fiski- og samferðslumálaráðið