Bjørt Samuelsen hitti skotska starvsfelagan

Formansskapurin í løgtinginum er í hesum døgum á vitjan í Skotlandi, og í gjár hitti Bjørt Samuelsen, løgtingsforkvinna, skotsku tingforkvinnuna, Alison  Johnston.

Næstforfólkini, Jóhannis Joensen og Elsebeth Mercedis Gunnleygsdóttir, vóru eisini á fundinum, umframt skotsk og føroysk embætisfólk. Á fundinum vóru mál av felags áhuga umrødd, og hvussu tingskipanirnar í londunum báðum virka.

Hetta er fyrstu ferð, at ein føroyskur formansskapur vitjar í Skotlandi.

Formansskapurin í Skotlandi

Felags áhugamál

Tingforkvinnurnar báðar vóru samdar um, at løgtingið og skotska tingið hava fleiri felags áhugamál, har báðir partar kunnu læra hvør av øðrum. Tær vilja tí fegnar byggja tættari sambond millum tingini bæði.

Skotska tingið var tikið av í 1707, men endurstovnað í 1999 eftir ynski frá skotska fólkinum.

Tingfólkini, sum eru 129 í tali, eru vald úr øllum Skotlandi, og tey viðgera mál á yvirtiknum málsøkjum.