Fyrsta heildarútgávan hjá Einagran á gáttini

"Kærleiksvísa" eitur nýtt staklag hjá bólkinum Einangran, sum varð tókt á stroymingtænastunum fríggjadagin. 

Nýggja staklagið skilmarkar, at føroyski superbólkurin er á gáttini við sínar fyrstu heildarútgávu, "Vendir vindar", sum kemur út 29. setember. 

Undir heitinum superbólkur liggur tann sannroynd, at Einagran er mannaður við tveimum av okkara fremstu tónlistafólkum, Leu Kampmann og Heiðriki á Heygum, sum hvør í sínum lagi eru sangarar og sangskrivarar og annars geva tónleik út undir egnum navni. 

Eitt úrslit av korona

Einagran er eitt beinleiðis úrslit av koronafarstóttini. Heiðrik á Heygum og Lea Kampmann sótu føst í somu íbúð í Keypmannahavn í fýra mánaðar, tá koronusóttin legði Danmark lamið í mars 2020.

Fyri at stytta sær sum stundirnar, so byrjaðu tey at spæla stovukonsertir beinleiðis á netinum. 

Úrslitið varð, at Einagran varð stovnaður og burtur úr spratt sjálvnevnd EP, har lagið "Kanska" gjørdist ein landaplága í Føroyum og vann heiðurslønina fyri besta lag á FMA 2020.

Einagran

Tvær útgávukonsertir

Tað eru Janus Rasmussen, ið er kendur frá BYRTA og Kiasmos, og Sakaris Joensen, ið er kendur sum einstaklingatónleikari undir egnum navni, ið hava framleitt bæði "Kærleiksvísa" og komandi heildarútgávuna "Vendir vindar": 

Í sambandi við útgávuna av "Vendir vindar" 29. september, so hevur Einagran útgávukonsertir í Norðuratlantsbryggjuni í Keypmannahavn 27. oktober og í Norðurlandahúsinum 28. oktober. 

Nýggjasta staklagið og onnur stakløg, sum Einagran hevur givið út í sambandi við fyrstu heildarútgávuna, kunnu hoyrast á Spotify.