Kona forsætisráðharran í prestaskjúrtu

Birgitta Ed, kona svenska forsætisráðharran, Ulf Kristersson, hevur verið fyri atfinningum fyri, hvussu hon hevur verið ílatin, nú hon hevur verið við manni sínum í Vilnius, í sambandi við NATO-toppfundin har.

Birgitta Ed er prestur í svensku kirkjuni, og funnist verður at, at hon á fleiri fundum í Vilnius hevur verið í síni almennu prestaskjúrtu.

- Tað sømir seg ikki, tá ið tú alment umboðar Svøríki, at tú ert í klæðum, ið sipa til títt privata yrki. Serliga ikki, tá ið tey umboða átrúnað, sigur fyrrverandi ríkisdagslimurin, Richard Herrey.

Sjálv svarar Birgitta Ed, at hon er altíð prestur, og er í prestaskjúrtu í øllum høpum.

- Soleiðis er veruleikin bara, at eg eri bæði prestur og kona forsætisráðharran samstundis, sigur hon.