Sláið Ring norrønt herðaklapp

Gunnar Restorff, formaður í Sláið Ring, tók ímóti heiðrinum, ið millum annað er grundgivin soleiðis:

“Sláið Ring hevur við síni luttøku á norðurlendskum dansi- og mentanarstevnum í Føroyum og í hinum Norðurlondunum verið við til at styrkt norðurlendskt samstarv, umframt at menna og kunna um føroyskan dans, kvæðamentan og føroyskan mentanararv.”

Eisini verður sagt, at “tey lokalu dansifeløgini í Føroyum við dansi, kvæðum og dansispølum halda við líka og menna dansin, og við luttøku á norðurlendskum dansistevnum eru tey við til at styrkja norðurlendska samstarvið.”

Hetta er áttandu ferð, at norðurlendska herðaklappið verður latið, og tað verður latið persónum ella felagsskapum, ið hava gjørt nakað serligt fyri annaðhvørt at gera vart við Føroyar í Norðurlondum ella Norðurlond í Føroyum.

Hesi hava fingið Norðurlendska Herðaklappið frá Norrøna Felagnum:
2015: Ragnar A. Jacobsen, útvarpsvertur
2016: Leif Sørensen, kokkur
2017: Torbjörn Nyström, stigtakari til svenska-føroyska orðabók
2018: Sissal Kjartansdóttir Kristiansen, sniðgevi
2019: Kórsamband Føroya
2020: - eingin handan
2021: Þóra þóroddsdóttir og Martin Næs, týðarar
2023: Sláið Ring, landsfelag føroyskum dansi at frama