Velja nýtt landsstýrisfólk í hesi vikuni

Nýtt landsstýrisfólk í fiskivinnumálum verður helst funnið hesa vikuna.

Tað siga keldur, sum Kringvarpið hevur tosað við.

Eftir at Dennis Holm hósdagin í farnu viku bað løgmann loysa seg úr starvinum sum landsstýrismaður, skal nýtt fólk seta seg í sessin.

Landsstýrismálanevndin kunngjørdi mikudagin niðurstøðu sína, at Dennis Holm hevði ikki neyðuga lógarheimild til at broyta kunngerðina um at skipa fiskiskapin eftir svartkjafti í 2024, soleiðis at ein partur av svartkjaftakvotuni varð gjørdur til felagskvotu við hámarki.

- Ta niðurstøðuna taki eg til eftirtektar. Fyri at tryggja politiskan arbeiðsfrið, eru vit komnir ásamt um, at best er, at landsstýrismaðurin leggur frá sær, stóð í boðum frá Akseli V. Johannesen,  løgmanni, hósdagin.

Helst onkur í tingmanningini

Hvør verður nýtt landsstýrisfólk í Fiskivinnumálum er ikki greitt, men sum skilst, verður tað helst ein úr tingmanningini.

Í tinginum fyri Tjóðveldi eru í løtuni Eirikur í Jákupsstovu, Annika Olsen, Hervør Pásldóttir, Bjørt Samuelsen, Liljan Weihe og so Dennis Holm, sum kom aftur í tingið, eftir at hann fór frá sum landsstýrismaður.

Sum skilst, er ætlanin at Fiskimálaráðið fær nýtt landsstýrisfólk hesa vikuna.

Vit hava ringt til Sirið Stenberg, forkvinnu í Tjóðveldi, men hon svarar ikki telefonini.

Í sms-boðum sigur hon seg vóna, at alt er avgreitt innan eina viku.