Trygdarráðstevnan í München byrjar í dag

Árliga trygdarráðstevnan í München byrjar í dag, og heldur fram til sunnudagin. 

Ráðstevnan verður roknað sum heimins fremsti pallur innan verju- og trygdarpolitikk, og í ár snýr hon seg um geopolitisku gongdina og framhaldandi kríggið hjá Russlandi. 

Ukrainski forsetin, Volodymyr Zelenskyj, fer at hitta amerikanska varaforsetan, J.D.Vance, á ráðstevnuni.

Uttanríkisstjórin í ES, Kaja Kallas, er eisini á ráðstevnuni, saman við forkvinnuni í ES-nevndini, Ursulu von der Leyen, og aðalskrivaranum í Nato, Mark Rutte.

Aksel V. Johannesen, løgmaður, og Mette Frederiksen, forsætisráðharri, eru eisini á ráðstevnuni.

Mette Frederiksen og Kaja Kallas

Mette Frederiksen, forsætisráðharri, og uttanríkisleiðarin í ES, Kaja Kallas, eru eisini á trygdarráðstevnuni. (Mynd: AFP/RitzauScanpix)

Týðandi høvi

Í tíðindaskrivi í morgun frá danska forsætismálaráðnum, sigur Mette Frederiksen:

- Við álvarsligu støðuni, sum Evropa er í, er trygdarráðstevnan í München týðandi høvi at økja um samskiftið við starvsfelagar og sameind um broytingar í geopolitiska veruleikanum og um kríggið á meginlandinum. Í hesum tíðum eru samleiki og samgongur avgerandi. Serliga mugu vit standa saman um framhaldandi at stuðla Ukraina.

Hóast amerikanski forsetin, Donald Trump, hevur tosað um fund millum leiðandi umboð úr Moskva, Kyiv og Washington í dag, so vísir Ukraina aftur, at tað hevur ætlanir um at tosa við russarar. 

Ráðgevin hjá Zelenskyj, Dmytro Lytvin, leggur dent á, at einki liggur á samráðingarborðinum. 

Trump segði mikudagin, at hann og Putin vóru samdir um at fara undir samráðingar fyri at enda kríggið. 

Zelenskyj svaraði aftur við at leggja dent á, at Ukraina, sum sjálvstøðugt land, ikki kann góðtaka, at avtalur vera gjørda, uttan at Ukraina er við.